Mar 1 | ASO | STEP | O'moso'mi gipele Izesu' Kilisito' ezemu' gamazi lamine' nene gana' api' ogo soto' ine' ma ti' lo neive:

Mark 1

Mono' Noso Holo-ngedaa' Ive Zohane' Mono' Gamazi Lo-ngimine'

(Mataio' 3:1-12; Luka' 3:1-18; Zohane' 1:19-28)

1 O'moso'mi gipele Izesu' Kilisito' ezemu' gamazi lamine' nene gana' api' ogo soto' ine' ma ti' lo neive: 2 O'moso'mi gamazi lo soto' o-ngemaa' ive polohete ma gulive Isaia' aza luhuvo ma gizingu' O'moso'mo guvelesi vemu' gamazi lo-imine' nene ti' lo gize neive:

Gelezo. Naza neze gamazi lo-ngeme ngeme' ilive imiselekuvo
aza do gomu' molo akaka vele-gedeleseive.
3 Ebe' hadivelati' ve mali'mo asi naba ma ti' lo nolive:
Guvelesi ve alingumu' ve li aka've di va'va' igi di lisihe' i-dilo.
4 A'mine ne'mine lido' e'meto evene' mono' noso holo-ngedaa' ive Zohane' aza misubo hadiveu' vo soto' ogo evene' ti' lo lo-ngimine': O'moso'mo lengi' lihimetine hulo-lengedelingumu' ve li lutine di velepe' izi mono' noso hilalo lo lo-ngeme ngeme' ogo minine'. 5 Minavo Zudaia misubokotikisi Zelusalemi numungutikisi evene' muki' ezela vi heteli lihime'ine li soto' ikevo Zodani nosou' noso holo-ngidine'. 6 Zohane' aza kamela ize zopovodunu' lili' ani' genegana've izo ize losuvodunu' lili' ani' leti ma gopololo' izine'. Ido' noso' nite've naa' ine' nene ma'nabuso ido' himoni novozo nesi no minaa' ine'. 7 No mino evene' ti' lo lo soto' ogo lo-ngeme ngeme' ogo minine': Evene' mehe'nela alinge' ma nave nene nezesi nivile' o-nedosa ve naba ve. Naza a'ne'mine'mine goboni gono do-do ei' suu'veloti' nala've nesi nene gubi' izo apase hulo-delodo' nene mo lisihe' amuve. 8 Naza noso holo-lingiduvoni' nene haza nosotunu' holo-lingiduve. Ne neiha a'mine ve ne'mo noso ne'mine holo-lengedeline' nene O'moso'mi Sikalahukisi ne neive.

Zohane' Noso Holo-davo Satani'mo Izesu'ni Emengu' Molani' Gamazi

(Mataio' 3:13-4-11; Luka' 3:21-22; 4:1-13)

9 A'mine gamene neu' Izesu' aza nGalilaia misubou' numuno ngomo ma Nasalete nene hulo vo hetelavo Zohane' aza Zodani nosou' holo-dine'. 10 Holo-davo nosouti' dizosa a'mido' ningine' nene okulumo' ne ngolo' lavo Sikalahu' ne'mo nama viluso ne'mino lulou' dizelesa nolimivo ningine'. 11 Ne'mine ogavo Okulumokuti' gamazi ti' lo limine': Gaza nene vo'nelo' gipe'ne hamo' nene nane. Gezemu' nene mo mulu'neu' lamine' nogiluve.

12 Ido' neloti' geto Sikalahuli'mo Izesu'ni nene hadive misubou' imiselavo vine'. 13 Vavo a'mida nene Satani'mo emengu' molo'mo novivo gamene foti (40) vine'. Ido' a'mida nene Izesu' aza loposo nama gaha minaa' ada neivo angelo' nete nasahili' i-dii hize ele' i-di minani' ve.

Izesu' Aza Gono've Api' Ogo Do Alaha' Daa' Ave Seta've Seta've Ei' E'metilizave Lo Asi Lo-ngedo Do Gi'mizine'

(Mataio' 4:12-22; Luka' 4:14-15; 5:1-11)

14 Ido' Zohane'ni nalato' huli-dikevo neivo Izesu' aza nGalilaia misubou' vo O'moso'mi gamazi lamine' lo soto' ogo ti' lo lo-ngimine': 15 Gamene nene mo ogave. O'moso'mo gizebo o-ledeline' gamene alitave. Nemu' nene lingine lutine di velepe' izi gamazi lamine' mene gili ele'vole' ilo lo lo-ngimine'.

16 Ido' Izesu' aza nGalilaia noso ohuno naba'mi gahevela nomono Simoniki nakunolo Adeleaki ingine alaha' daa' asive minasinako alaha' daa' asine' golaleze'ine nene alaha' dalisa nosou' nihulasivo ningine'. 17 Ningo ti' lo lo-ngimine': Lingine igi ne'metilizo. Alaha' daa' nasine' ne'mini evene' di nenita iga' ilisive lo lengele'mize molaloze. 18 Ne'mine lavo ingine lite' li alaha' daa' asine' golaleze'ine hitiki e'meti vasine'.

19 Ve sita' nene do gi'mizo ngomo ma novo aza Zebedaio' gipele sita' Zakoboki nakunolo Zohaneki sipiu' mini alaha' daa' ani' golaleze'ine nene ongoti di lamine' nasivo ningo 20 asi lo-ngemavo gili me'nibo Zebedaio'nisi agove'vesi sipiu' huli-ngimiki e'meti vasine'.

Sikalahu' Goloso Lulou' Minive Izesu' Do Lamine' O-dine'

(Luka' 4:31-37)

21 Ingine vi Kahanaumi numungu' mini holise' gamene naba ogavo mono' numungu' dizi Izesu' mono' gamazi apize ngimine'. 22 Ido' apize ngimine' gamazimu' nene vo'ine vavo upuho' ani'. Ee, aza mono' apize ngimine' nene avo'ningeliti mono' gamazi apizi ngimaa' avete apizi ngimaa' ani' ne'mino apize ngemamo asi gamazi meleho ne'mine'mo apize ngimine' gelavo nemu' vo'ine vavo upuho' ani' ve.

23 Ne'mine nilavo a'mine mono' numu'ningu' nene ve ma minine'. A'mine ve'mi lulou' nene eveneliti luteu' do goloso oga' ive Satanilati' sikalahu' nene minavo aza geke' lo ti' lo line': 24 Nasalete ve Izesuvo, leli' nonida mene nanimu' ane. Gaza do goloso o-ledelesa abe. Geze nene naza mo ningo gele nouve ma nene nane. Gaza nene O'mosolati' kegeso lamine' minanive ma nene nane. 25 Ne'mine line'za Izesu' aza elemo ti' lo lo-imine': Gamazi lamo zegene' oko mino evene' hulo-do lemo ogo vozo. 26 Ne'mine lavo a'mine sikalahu' goloso nene vauve elo evene' do upuho' ogo do gesevase ize-do geke' naba lo lulouti' lemo vine'. 27 Ne'mine ogo lemo vavo evene' ingine ningi upuho' igi angise oko'ningu' longo' i huli volelo' melo' igi ti' li lani': Mene nani suno ve. Ve mene amuzo ve mino sikalahu' goloso gamazi lo-ngemavo gamazi've gili daa' nave li li volelo' melo' ani'. 28 Ne'mine ikevo guvele nene hutile' ogo nGalilaia misubou' numudo' namado' mone osu' line'.

Petolo' Elenahi Izelehine Izesu' Do Lamine' O-do Inite' Gizi Dave Muki' Do Lamine' O-ngidine'

(Mataio' 8:14-17; Luka' 4:38-41)

29 Ne'mine ogavo mono' numunguti' limi Simoniki Adeleaki numu'ningu' Zakobole Zohanelesi dizani'. 30 Simoni' elenahi izeleho nene oko'nolo' olo' ahu' lavo ongo neivo nemu' Izesu'ni geti li-imani'. 31 Li-imikevo aza neida vo analo' do do ote-davo oko'nolo' olo' ahu' line' nite' nene a'mido' geto hulo-davo lamine' gelo noso' nite' gize vata' o-ngedo nasahili' o-ngidine'.

32 Ido' nivenga' ho' lemavo inite' gizi davesi lu'ningu' sikalahu' goloso minivesi muki' ezela ngele'mizi di ika' ika' ani'. 33 A'mine numudoti' aleve muki' nene igi gatedo' di gese' ani'. 34 Ne'mine ikevo aza inite' ato atoli'mine gizi dave muki' do lamine' o-ngedo sikalahu' goloso muki' evene' maliti lu'ninguti' ngimiselo do huline'. Ido' Sikalahu' goloso ingine eze ningi lamine' igi gili nizani' nenako gamazi lamilo lo lo-ngemo ngimiselo do huline' ve.

Izesu' Mono' Lo-ngeme ngeme' Ogo nGalilaia Misubouko Mone'mo Vine'

(Luka' 4:42-44)

35 Nedenga' go' olihe lamivo Izesu' aza oto guviseu' evene' nizamangu' vo O'mosola lo minine'. 36 Ti' neivo Simoni' nene gonolomotesi ingine vise' i'mi vani'. 37 Ningi ti' li li-imani': Evene' muki' gezemu' vise' nave. 38 Li-imikevo aza ti' lo lo-ngimine': Naza mono' lo soto' ogo lo-ngemelongisi numuno ebe' avito' minani' nela vukele'zo. Naza nene mo ne'mine olove losa uvoni' ve lo lo-ngimine'. 39 Ne'mine lo aza mono mono' numu'ningu' mono' lo soto' o-ngeme'mo vo ido' sikalahu' goloso evene' maliti lu'ningu' dizi minani' nene ngimiselo hulo'mo vo nGalilaia misubou' minani' ebe' mukiku' nene mone osu' line'.

Izesu' Aza Ganadise Gize Dave Ma Do Lamine' O-dine'

(Mataio' 8:1-4; Luka' 5:12-16)

40 Ido' ganadise gize dave mali'mo ezela ogosa obuvolo hize emo amuzonga lo ti' lo lo-imine': Gaza do lamine' o-nedeline' amuzokasi naine' nene naza mo gele mino do lamine' o-nedeline lo gele nouve. Gaza do lamine' o-nedelesa gele nabe. 41 Ne'mine lavo Izesu' muluno hukavo ganadise gizi dave i-ngidisa'mani' inite' o-do ana hulo molo oko'nolo' hito ti' lo lo-imine': Naza do lamine' o-gedelesa gele nouve. Nemu' gaza lamine' ozo. 42 Ne'mine lavo ganadise ne'mo lite' lo oko'noloti' hulo-do vavo lamine' giline'. 43 Lamine' gelavo Izesu' aza geto gamazi amuzo molo lo-emo imiselo nohulo ti' lo line': 44 Gele nabe. Gaza lamine' aine' monovo nene evene' hamokisi lo-ngemamozo. Eveneto' medelo mino O'moso inite' lehize-daa' ive ne'mo ganadise okongaloti' hulo-gedo vine' nene ningo lo soto' ogavo gaza lamine' aine' nemu' nene evenelite ningi gililizangumu' ve lo ne'mine ozo: Ganadise gizi dave ingine lamine' igi ma ize inite' ne'mine ne'mine O'moso imilisave lo Mose' lo huko lido' nene e'meto eveneto' medelo mino O'moso inite' lehize-daa' ive nene inite' ma O'moso oloku' gize emelingumu' nene do vo emezo lo lo-imine'. 45 Ne'mine lo lo-imine'za ve aza vo a'mine gamazi api' ogo vetete' ogo do hutile' ine'. Ne'mine ogavo nemu' nene evene' gili Izesu'ni lisilizani' o vivo aza nene numuno ebeku' soto' vamilido' ogavo haza guvisela neivo numudo' namado' ve nene ezela igivo' minani' ve.